اليوم الثاني الصبح ..
كنا نفطر مع عمتي .
جا يوسف.
يوسف: "ها ياسمين متى تبين تروحين"
عمتي: "تعال حبيبي افطر"
يوسف: "لا يمه مفطر الحمدلله"
ياسمين: "مدري متى فاضي انت؟"
يوسف: "الحين زين؟ لانه عقبه مشغول مره"
ياسمين: "طيب اوكي الحين نقوم نلبس، نوف بتجين معنا؟"
نوف: "لا لا انتو روحو انا تعبت امس والله"
عمتي منيره: "تطلع معي نوف حبيبتي"
يوسف: "يلا بروح اطلع السياره و اجي لا تتأخرون"
قمنا انا و ياسمين لبسنا و رحنا .
بالسياره.
ياسمين: "دقيقة دقيقة اوقف بسرعة"
يوسف: "وشو شفيك"
ياسمين: "اوقف على جمب الله يخليك بس شوي بسرعة"
وقف يوسف: "شفيك بسم الله"
ياسمين: "تركي يتصل بنزل ارد عليه و اجيكم مارح اطول"
يوسف: "الحين موقفتنا علشان كذا؟ ماتقدرين تكلمين هنا يعني"
ياسمين: "بعزمك على الغدا اليوم حبيبي انت" و نزلت من السياره.
يوسف: "والله مو صاحيه"
ضحكت.
يوسف: "تسوي معكم كذا دايم؟"
ضحكت: "ايه ما تكلم قدام احد ماتحب"
يوسف: "والله خبله"
شغل يوسف الراديو.
يوسف: "عندك اغاني بجوالك؟"
"ايه بس اخاف ماتعجبك"
يوسف: "لا مايخالف خذي شغليها"
شبكت جوالي و شغلت.
"ترا ماعندي غير عبدالمجيد"
يوسف: "حطيه مايخالف"
شوي و جت ياسمين.
يوسف: "ها خلصتي"
ياسمين و هي شاقه الضحكة: "خلصت"
يوسف: "الله يعينه بس المسكين و يصبره على هبالك"
ياسمين: "الحين متى تجيب لي سياره؟ طفشت وانا اطرك توديني و تجيبني"
يوسف: "والله اذا وافقت امي رحت اجرت لك سياره"
ياسمين: "يلا يوسف لاتصير اخو نجس"
ضحك يوسف: "خلي منور توافق و اجيلك"
وصلنا السوق .
ياسمين تدور و حنا وراها.
تشتري و تعطي يوسف الاكياس .
يوسف: "انا بروح السياره احط الاغراض و اجيكم"
ياسمين: "طيب بس لاتطول"
راح يوسف.
ياسمين: "يلا دامه راح خليني اروح اشوف الفستان بسرعة"
"ليه ماتبين تقولين له"
ياسمين: "اخاف يعلم امي"
"وليه ماتبين عمتي تعرف"
ياسمين: "علشان بتقول لا تشرينه"
"ليه"
ياسمين: "مب وقته الحين، خليني اروح اشتريه و عقبه افهمك"
رحنا المحل.
وانا انتظرها تلبس الفستان حاكاني يوسف واتساب .
- تعالي تحت
-تحت وين
- القهوه اللي عند الباب
-طيب بس تخلص ياسمين
-لا بدون ياسمين
-حرام
-ماتعبتي؟
-تعبت بس حرام اسحب عليها
-قوليلها بروح اشتري شي صدقيني مادرت عنك
-طيب بس شوي و اجيك
"ها ياسمين ماخلصتي"
ياسمين: "يلا لحظه"
طلعت.
ياسمين: "وش رايك"
"ماشاءالله، يجنن شكلك بسم الله عليه"
ياسمين: "صدق؟"
"ايه ماشاءالله مره حلو عليك"
ياسمين: "طيب صوريني بجوالك و ارسليلي اياها بوريها تركي"
"احس لاتورينه، مب انه فال شين زي ما تقول نوف بس انه احلى يوم العرس يشوفك لابسته اول مره"
ياسمين: "طيب صوريني و ارسليلي مارح ارسله"
صورتها.
"طيب ياسمين بروح انا ابدل شي نوف شرته امس"
ياسمين: "اجي معك طيب"
"لا لا عادي انتي خلك هنا اشتري اغراضك عروس حرام مابي اشغلك معي، شوي و اجيك طيب؟"
ياسمين: "طيب اوكي"
نزلت تحت عند الباب ادور يوسف .
لقيته قاعد.
"حرام والله قلبي مو مطاوعني اتركها كذا"
يوسف ضحك: "دايم اسوي فيها كذا عادي، هي تطفش مره بالسوق"
"طيب حرام لو معها اكياس من يشيلها؟"
يوسف: "بتكلمني لاتخافين عليها، تبين نطلب شي؟"
"لا شكرا توني مفطره"
يوسف: "انا بعد توني مفطر بس مايخالف خنطلب شي"
ضحكت: "طيب اطلبلي قهوه دامك ملزم"
يوسف: "عصير برتقال؟ ايه والله انا بعد مشتهيه"
ضحكت: "قهوه وش عصير برتقال"
يوسف: "يووه اموت على التشيز كيك انا عاد، خلاص بطلب معك"
ضحكت.
طلب و رجع جلس.
يوسف: "اقولك شي بس ماتزعلين"
"ايه؟"
يوسف: "تصدقين من جيتو احس نفسيتي زانت، احسني مبسوط، مبسوط فيكم، مبسوط فيك"
ابتسمت: "الحمدلله انك مبسوط، انا بعد والله مبسوطه"
يوسف: "يعني دايم لما امي تجي بلحالها انبسط ايه بس مب هالكثر"
"ياحليلك.. بس ليه ازعل مافهمت"
يوسف: "يعني خفت تفهمينها غلط"
"لا مازعلت انا بعد مبسوطه فيك"
يوسف: "والله؟"
"ايه والله"
يوسف: "طيب قومي قومي نشوف ياسمين"
ضحكت: "والعصير؟"
يوسف: "ماعاد نبيه العصير خلاص"
اخذنا ياسمين وحنا بالسيارة ..
يوسف: "ياسمين تكلمين نوف نمرها و احطكم تتغدون بمكان"
ياسمين: "ايه والله جعت، الحين اكلمها"
يوسف: "بس قوليلها لاتشوفها امي"
ياسمين: "ليه"
يوسف: "نايمه لاتصحونها انا اخذها بعدين اوديها"
مرينا نوف
يوم وصلنا المطعم.
يوسف: "انتو انزلو انا بودي ريما تبي محل هنا قريب و اجيكم"
ناظرتني ياسمين: "محل وشو تبين"
يوسف: "محل بعدين تقولك انزلي ورانا سيارات"
ياسمين: "يلا يلا نازله، يلا نوف"
يوم نزلو ناظرت يوسف: "وش المحل اللي ابيه؟"
يوسف: "مو تبين تشوفين الملعب"
"ايه صح نسيت"
يوسف: "طيب يلا تعالي قدام بتتركيني كذا كاني سواق"
ضحكت: "يلا جاية"
ركبت جمبه.
"بعيد الملعب؟"
يوسف: "لا قريب من البيت هو، يعني ربع ساعه عشر دقايق"
"اجل عطني اشغل اغاني"
يوسف: "بعد؟ عبدالمجيد؟"
"قلتلك ماعندي غيره عندك اغاني بجوالك اشبكه"
يوسف: "منزله اغانيه هو بس؟"
"ايه احبه"
يوسف: "قد رحتي له حفله؟"
"لا ودي مره"
يوسف: "انا قد رحت"
"احلف"
يوسف: "والله، خايس يازين رابح بس"
"حرام عليك عبدالمجيد خايس! بعدين اي حفله رحت؟ متى كانت؟"
يوسف: "تبين اوديك؟"
ضحكت: "ياليت تسوي فيني خير والله"
يوسف: "صدق ما امزح تبين؟"
ضحكت: "شلون توديني"
يوسف: "اوديك بعدين"
"بعدين متى"
يوسف: "بعدين"
ضحكت: "ان شاءالله"
يوسف: "ان شاءالله، الله كريم"
"الله عاد لو توديني، بحبك للأبد"
ابتسم و سكت.
يوسف: "هذا هو وصلنا"
"ماشاءالله كبير"
يوسف: "لحظة بس ادور موقف و ننزل"
"وناسه كنت متوقعته اصغر"
يوسف: "ايه لا ملعب صدقي"
نزلنا.
"ماتعلبوني معكم؟"
يوسف: "ان شاءالله لاصار فريق ابوي لعبّتك"
"وين لبسك طيب ليش مب لابس"
يوسف: "لسا هو مابدا، بس بوريك الملعب و اوديك للبنات و عقبه ارجع"
"طيب ابي اشوفك تلعب انا، ابي مباراه صدقيه"
يوسف: "بكره فيه مباراه، بس العصر"
"طيب مايصير كلنا نجي نشوفك؟"
يوسف: "لا وش كلكم، بعدين امي و ياسمين مايحبون هالسوالف"
"طيب انا اقول لنوف و نجي"
يوسف: "لا خله انتي بلحالك احسن"
"بس وش اقولهم، مابي اصير كأني مسويه شي غلط زي تو، ليتك قايلها انك بتوريني الملعب"
يوسف: "لا لاتقولين لها، لاتقولين لهم، مب مسويه شي غلط بس احسن"
"مدري.."
يوسف: "عادي اذا ماودك تجين"
"لا ودي اجي بس وش بقولهم"
يوسف: "اي شي هي كلها ساعتين"
"ساعتين كثير يوسف"
يوسف: "اللي تبينه اذا ماودك لاتضغطين على نفسك"
"لا ابي اجي بس بفكر.. "
يوسف: "طيب تبين نرجع؟ علشان تلحقين تتغدين مع البنات"
"ايه يلا لا نتأخر عليهم"
وصلني يوسف عندهم،
"انت مو نازل؟"
يوسف: "لا قلتلك عندي الحين تمرين"
"اوه.. طيب بالتوفيق" و ابتسمت.
ابتسم.
نزلت و سكرت الباب .
يوسف: "ريما"
التفت
يوسف: "خذي هذي لو سألوك وش شريتي"
تعليقة مفاتيح.
ابتسمت: "شكراً"
يوسف: "العفو"
دخلت المطعم و مشى.
لقيت نوف جالسه بلحالها
قعدت قدامها: "وين ياسمين"
نوف: "بسم الله روعتيني، راحت تكلم تركي"
"يا هالتركي اللي ماتكلمه قدامنا"
نوف كانت ماسكة جوالها و مبتسمه.
"طيب طلبتو اكل؟"
ماش موب معاي ابد.
"نوف!"
نوف: "هاااه نعم"
"طلبتو اكل؟"
نوف: "لا طلبنا حلا تبين تطلبين اكل اطلبي"
و مسكت جوالها و تضحك.
"طيب ليه تضحكين ضحكينا معك"
نوف: "لا مارح تضحكين معاي انتي بتنفسين"
"لا اضحك قوليلي"
نوف: "احمد"
"لسا تحاكينه؟"
نوف: "ايه لسا احاكيه، ريما ماتتخيلين قد ايش كيوت"
"طيب لا يلعب عليك بس خلك عاقله"
نوف: "وش يلعب عليك انتي ليش معقده الموضوع كذا؟ لازم يلعب يعني؟ مافي شي اسمه احبه و يحبني؟"
"لا مافي"
نوف: "طيب طيب اطلبي اكل و اتركيني بحالي"
"ايه بطلب اجل بقابلك انتي و الحمار اللي تكلمينه"
طلبت اكل و قعدت.
نوف ماحكت ولا كلمه.
ماسكه جوالها و تبتسم كل شوي زي الخبله.
جت ياسمين شاقه الضحكة من بعيد.
ياسمين: "يا هلا بالزين كله، متى جيتي"
"توني جايه"
ياسمين: "احسني طايره من الفرح يا بنات"
"ليه شعندك انتي بعد"
ياسمين: "مغرومه" *باللبناني قالتها*
"ياحظي، انتي مغرومه و اللي جمبك مغرومه وانا قاعدة اكل"
ياسمين ضحكت: "مين اللي جمبي عسا نوف؟"
نوف: "لا وشو مغرومه" و ناظرتني نوف انه اسكتي.
"امزح، المهم ترا طلبت اكل ماتبين تاكلين انتي؟"
ياسمين: "الا اكل ليش ما اكل"
ضحكت: "الحمدلله و الشكر، كذا المغرومين يصيرون؟"
...
مرنا يوسف و رجعنا البيت.
يوم وصلنا.
يوسف: "لاحول من موقف بموقفنا"
ياسمين: "طبيعي ان احد يوقف بموقف بيتك؟"
يوسف: "مدري عنهم انزلي شوفي فيه احد جوا السياره"
ياسمين: "هاو انا انزل؟ انت انزل اخاف"
يوسف: "خذي و طلعيها من موقفي لو سمحتي"
عطاها مفتاح.
ياسمين: "شلون معك مفتاح؟ سياره مين هذي"
يوسف: "سيارتك يالخبله اجرتها تسوقينها الين ترجعون"
ياسمين: "كذاب!!! امانه يوسف احلف!! احبك يوووه بصيح"
و نزلت تركض.
"هي معها رخصه؟"
نوف: "ايه تعلمت من كم سنه و اخذت رخصة بس خالتي ماتبيها تسوق، شلون خليت خالتي توافق يوسف ؟"
يوسف: "اقنعتها، قلتلها انا مشغول ماقدر اطلعكم دايم"
ياسمين: "وناسه تعالو اخذكم لفه تكفوون"
يوسف: "خذيهم هم انا عندي كلاس لازم اروح"
نوف: "خذيني انا جايه يلا دقيقة"
نزلت نوف من السياره.
"بكره مباراتك الساعة كم؟"
ماكان منتبه اني اكلمه.
ناظرني: "مباراتي؟ العصر"
"ايه الساعة كم"
يوسف: "٤"
"طيب، يلا قودلك بالكلاس"
و نزلت من السياره.
ركبنا مع ياسمين شوي عقبه رجعنا البيت.
...
اليوم اللي بعده
نوف: "ريما قومي كلهم لابسين بيطلعون"
"تعبانه نوف ماقدر"
نوف: "شفيك تعبانه"
"بطني يوجعني مره، شكله من اكل امس"
نوف: "طيب تبين اسويلك شي تشربينه؟"
"لا شكراً بس بنام و يروح ان شاءالله"
نوف: "طيب تبين اقعد معك؟"
"لا لا روحي بنام و بصير زينه"
نوف: "طيب.. بقولهم انك مب رايحة.."
جلست شوي على السرير انتظر الين يروحون.
يوم راح الصوت طلعت اتأكد ان مافي احد ..
تحممت و لبست.
كانت الساعة ٢
سويتلي اكل و قهوه و قعدت انتظر بالصاله.
عقب ساعة يمكن جا يوسف
يوسف: "مارحتو؟"
"الا راحو بس انا مارحت"
يوسف: "ليه"
"انتظرك.. عندنا مباراه اليوم نسيت؟"
ابتسم يوسف: "لا مانسيت، يلا بس اخذ شور و البس بسرعة و نروح"
"يلا انتظرك"
..
يوسف: "هاذي امي تدق"
"لايكون رجعو البيت و مالقوني"
يوسف: "لا مايمديهم قصري الصوت خلني اشوف وش عندها"
يوسف: "هلا منور، الحمدلله توني مخلص ايه، لاعندي مباراه بعد شوي، مين؟ ريما؟ ماتشوف شر ان شاءالله يمكن ايه ماكله شي مو زين، ان شاءالله حاضر، الحين قبل اطلع اطق عليها الباب اشوف اذا تبي شي، ابشري ، يلا حبيبتي مع السلامه"
"وش تقول"
يوسف: "اجل بطنك ها؟"
ضحكت: "وش اسوي علشان يتركوني و يروحون"
يوسف: "خايفة عليك المسكينه تقول روح شوفها اذا تبي شي"
ضحكت: "اشوه مشت عليها يعني"
يوسف: "ايه زين انك قلتي كذا، "
..
وصلنا الملعب .
"ماشاءالله زحمه مره"
يوسف: "ايه انتبهي لاغراضك"
قعدنا بمكان قدام ماكان مره زحمه.
"بتروح الحين؟"
يوسف: "شوي بس يجون"
"وناسه مره، مره الناس كثير ماشاءالله"
يوسف: "تصدقين، دايم اشوف الزحمه هذي واقول ليت واحد منهم بس جاي علشاني، واليوم الحمدلله. جا احد علشاني"
ابتسمت: "جايه اشوفك تكسر روسهم ان شاءالله"
يوسف: "اكسر روس ابوهم بعد لعيونك"
..
خلص يوسف مباراته.
"يافنان!"
يوسف: "كيف بس قولين لعيونك"
"رهييب"
يوسف: "ماجعتي؟"
"الا والله جعت و صكت راسي الشمس"
يوسف: "يلا بس بروح غرفه الملابس ابدل بسرعة و اجي تبين اوصلك السيارة تنتظرين؟"
"لاعادي انتظرك هنا"
يوسف: "يلا مارح اطول"
راح يوسف و قعدت انتظره
وانا جالسه اتصل عليّ رقم سعودي.
-الو
-ريما، انا محمد
-خير محمد صاير شي؟
-جمبك احد؟
-لا ليه شفيك
-صح انه هيا بنت خالتك مخطوبه؟
-مخطوبه؟ متى؟ من قالك؟
-سمعت
-سمعت من مين ، لا طبعاً لو انخطبت بتقول، بعدين هي اخر مره حسيت انها تبيك
-طيب تأكدي منها و ارجعي حاكيني
-وش اتأكد احاكيها اقولها والله محمد سمع انك مخطوبه و يبي يتأكد
-ايه وشفيها!!
-عيب تخيل مو صدق بعدين الوقت متأخر الحين
-ريما الحين كلميها!!! و اذا طلع صدق قوليلها تنساني ولاعاد تفكر فيني لانه انا بنساها و بشيلها من حياتي!!
-محمد اذكر الله الخبر اكيد مو صدق،
-بتكلمينها ولا انا اكلمها؟
-خلاص اكلمها انا بس بكره مو اليوم الوقت متأخر عندكم الحين
-طيب، انتظرك لا تطولين
-ان شاءالله، مع السلامة
سكرت و التفت وراي لقيت يوسف.
يوسف: "ها مشينا؟"
"من متى انت هنا بسم الله"
يوسف: "توني هاه،"
"ماشاءالله ماطولت، ايه يلا مشينا"
بالسيارة..
كنت شايله هم محمد، قاعدة افكر باللي قاله لي
مسكين من زمان يحبها،
كان يحاكيها زمان و فيصل اخوي درى و هاوشهم و بغى يعلم اهلها،
و هددهم انه مايحاكون بعض ولا بيعلم،
سخيف فيصل، يقوله حاكي بنات الناس عادي بس بنت خالتي لا.
ولا عاد صارو يحكون مع بعض محمد و هيا.
محمد راح امريكا يبي يكمل جامعته و ينسى بس ماقدر ..
قعد سنه و رجع و للحين مادخل جامعه..
تعبت نفسيته مره لما ماصار يحاكيها كيف الحين لما درى انها مخطوبه..
ممكن تصير مخطوبه صدق بس لسا ماعلمتنا..
بس شلون تنخطب و تنسى محمد بهالسهوله؟ اللي اعرفه انها تموت عليه و تبيه و قالت بنتظره يتخرج و يجي يخطبني..
يوسف: "شفيك ساكته"
"لا مافيني بس افكر"
يوسف: "كنتي تكلمين محمد تو؟"
"ايه"
يوسف: "قاعدة تفكرين باللي قالك اياه؟"
"فيه مشكله صايرتله هناك و زعلت عليه المسكين"
يوسف: "وانتو العاده كذا تحكون و يقولك مشاكله؟"
"يعني ايه"
يوسف: "ماشاءالله.. و نواف؟"
"لا نواف ما اشوفه واجد، وهو اصلا يستحي مايسولف"
يوسف: "ايه محمد يوسع الصدر اذكره يوم كان هنا، كان ينام بالغرفه اللي انتو فيها يوم كان ساكن معي"
"ايه.."
يوسف: "شتبين ناكل؟"
"يصير نرجع البيت و انت روح كل اذا ودك؟"
يوسف: "ليه انتي ماتبين؟"
"لا مو مشتهيه.."
يوسف: "طيب نرجع البيت .."
....
رجعت البيت دخلت غرفتي .
ارسلت لهيا واتساب .
"اذا قمتي حاكيني ابيك ضروري"
و تركت الجوال.
رحت الحمام غسلت وجهي وبدلت.
فتحت جوالي لقيت هيا مرسلتلي
- ؟
- بدق عليك
- لا تدقين
- ليه
- وش عندك اللي ضروري؟
- مايصير هنا اكلمك احسن
- ريما قولي هنا ما اقدر
- طيب .. بسألك شي سمعته بس قوليلي اذا صدق او لا
- وش سمعتي
- سمعت انك مخطوبه
- ايه؟
- بس، صح مخطوبه؟
- ايه صح
- و محمد؟
- وش فيه؟
- الحين محمد وش فيه؟ محمد اللي يحبك و تحبينه؟
- ريما محمد مايصلح لي
- الحين صار مايصلح لك؟
- ايه
- كذا بهالبساطه هيا؟
- ايه اعتذريلي منه
- اعتذر؟ اوه اقوله البنت اللي تحبها بتتزوج و تعتذر منك؟
- ريما لا تزودينها والله مب ناقصه
- طيب انتي تبينه؟
- مين؟
- اللي خاطبك
- ريما انا وافقت، ملكتي عقب شهر
- ما اصدقك هيا ، مو كنا نحكي من كم يوم عن محمد وانه مشتاق لك؟
- ممكن ماعاد تتكلمين عنه؟
- اوه ماعاد تبين تسمعين عنه اي شي
- ايه ما ابي
- طيب اللي تبينه على العموم مبروك
- الله يبارك فيك
زعلت ..
زعلت مره، محمد زي اخوي و صدق كنت ابيه ياخذ هيا،
كان حبهم كيوت، مب زي ياسمين و نوف اللي اتطنز عليهم، هذولي كانو يستحون.. يستحون لما احكي عن حبهم لبعض..
ماعرفت وش اقول لمحمد ..
وشلون اقوله ايه انخطبت وماعاد تبيك البنت؟
مايطاوعني قلبي اقوله..
مارح اقوله اليوم..
بكره اكلمه يمكن يكون هدى شوي ..
Keep going
ردحذف