وصلنا الرياض،
رحنا الطياره حقت امريكا و معنا ياسمين بنت عمتي منيره.
حاولت اتصل بأمي و ابوي ولا احد منهم رد.
ارسلتلهم مسج قلتلهم انه حنا بنروح الحين و سكرت جوالي.
...
وصلنا لوس انجلوس
ياسمين: "ها يمه وينه يوسف"
عمتي منيره: "كلمته يقول برا ينتظر عيو يدخلونه هنا"
ياسمين: "هذا هو شوفيه، شوفي واقف هناك"
رحناله.
عمتي منيره: "هلا حبيبي هلا"
يوسف: "الحمدلله على السلامة تو مانورت الديره"
ياسمين: "خذ خذ شيلهم انكسرت ايدي"
يوسف: "وراها كذا كثير، اوه ماشاءالله بنات خالي معكم"
عمتي منيره: "ايه بنت خالك ريما، و نوف بنت خالتك"
يوسف: "الحمدلله على السلامة" ناظرنا انا و نوف.
يوسف: "ماعلمتيني يمه ولا كنت جبت معي احد ولا جبت سياره اكبر"
عمتي منيره: "مو مشكله تكفي السياره ان شاءالله"
ركبنا السياره،
عمتي منيره جمبه و انا و ياسمين ونوف بالمقعد الي ورا.
عمتي منيره: "اشوه الجو زين"
يوسف: "ايه مابعد جا الحر الصدقي لسا تونا"
عمتي منيره: "البنات نايمين ماشاءالله؟"
"ايه نامو ياسمين و نوف، مانامو بالطياره عورولي راسي"
عمتي منيره: "حبايبي نوم العافيه،"
..
وصلنا البيت .
ياسمين و نوف راحو يكملون نومهم.
وانا قاعدة بالصاله.
عمتي منيره: "شفيك حبيبتي ريما، تعبانه؟"
"لا مب تعبانه.. بس من اول احاكي اهلي و مايردون"
عمتي منيره: "هاو نايمين الحين اكيد، عندهم ليل"
"مب الحين.. من قبل لانمشي يوم كنا بالرياض مايردون، مر يوم كامل و هم ما ردو ولا اتصلو فيني"
عمتي منيره: "ماعليه يمكن انشغلو شوي"
"ايه مو هو هذا اللي انا خايفة منه.. ينشغلون، اكيد شي مو زين"
عمتي منيره: "لا ان شاءالله مافيهم الا العافية اكيد بيحاكونك"
دخل يوسف.
يوسف: "منوري حبيبتي، هذي الاغراض اللي طلبتيها جبتلك اياها"
عمتي منيره: "الله يرضى عليك حبيبي ماتقصر"
جا جلس .
يوسف: "وين الباقين نايمين؟"
عمتي منيره: "ايه من جينا نامو"
يوسف: "طيب وش مخططاتكم اليوم، وين تبون تروحون"
عمتي منيره: "نشوف الحلوين وين ودهم" و ناظرتني.
مارديت.
عمتي منيره: "حبيبتي ريما صدقيني مافيهم الا الخير لا تشغلين بالك كذا"
يوسف: "مين هم؟"
عمتي منيره: "اهلها تقول مايردون عليها"
يوسف: "ليل الحين، اكيد مايردون"
"عمتي انا بقوم انام.. تصبحون على خير"
عمتي منيره: "لا لا تنامين، نروح نتغدا انا و انتي و يوسف بأي مطعم و عقبه نامي نومه العافية"
"لا انتو روحوا بالعافية انا مو مشتهيه، يلا تصبحون على خير"
..
-6:30Pm-
وانا نايمه دق جوالي،
نوف ماكانت موجودة بالغرفة
اتصل عليّ رقم بيت، سعودي.
-الو
- السلام عليكم
-وعليكم السلام
-استاذ خالد ال*
-ايه، ايه انا بنته خير فيه شي؟
-لا بس ياليت تبلغينه ان التحاليل طلعت
-معليش بس تحاليل وشو
-هو البارح جا سوا تحاليل هنا بالمستشفى، و طلب نستعجل فيها
-طيب تقدرين تقولين لي وش نتيجه التحاليل؟ ابوي فيه شي مريض شي؟
-اختي انا انطلب مني اني ابغلكم بأن التحاليل طلعت، ماعرف اي شي غيره
-طيب، يعطيك العافيه راح ابلغه ان شاءالله
-الله يعافيك
قمت احسبه حلم، قلبي بغا يوقف يوم قالت مستشفى، و بغا يوقف اكثر يوم قالت اسم ابوي ..
اتصلت بأمي كم مره ماردت.
مادري ليه موب قاعدين يردون عليّ
ماعندي حل غير اني اكلم الخدامة،
اتصلت عليها و قلتلها تعطيني امي .
-الو
-يما ليش محد يرد عليّ شفيكم
-هاو ريما، وشفيك داقه على جوال الخدامه
-لانه محد فيكم قاعد يرد
-طيب سكري سكري انا اتصل عليك من جوالي
-لا مارح تتصلين، علميني وش فيكم ابوي ليه راح المستشفى
-من قالك
-عرفت، ليش راح؟
-تعب شوي و قلنا نروح نتطمن عليه
-اكيد يمه؟ مو شي كبير؟
-لا لاتخافين بسيطة ان شاءالله
-طيب ليش سويتو تحاليل و قلتو تبونها بسرعة
-انتي من قالك هالكلام
-المستشفى اتصلو عليّ، انا حاطه رقمي بملف ابوي
-طلعت التحاليل؟
-ايه
-زين زين، الحين احاول اصحي فيصل من نومه يروح ياخذهم
-ليش طلبتو انهم يستعجلون يمه
-الدكتور اللي رحناله طلب كذا
-يعني فيه شي كبير اكيد..
-لا ان شاءالله مافيه
-طيب يلا يمه قومي فيصل و علميني وش يصير معكم، و ردي على جوالك الله يخليك والله طاير عقلي هنا و انا افكر
-ان شاءالله طيب
طلعت من الغرفه اشوف اذا فيه احد بالبيت .
ماكان فيه صوت ولا فيه احد،
رحت المطبخ ادور لي شي اكله مالقيت
اخذت عصير و رحت جلست بالصاله انتظر امي تدق تطمني .
وانا قاعدة طلع يوسف من غرفته.
يوسف: "قمتي"
"ايه.. وينهم الباقين؟"
يوسف: "راحو هنا سوق جمبنا، تبين اوديك لهم؟"
"لا لا مالي خلق.. انت ليه مارحت معهم"
يوسف: "وصلتهم و رجعت، قالت امي انك بالبيت لحالك و قالت اقعد معك"
"لاعادي كان رحت معهم.."
يوسف: "تبين اجيبلك شي تاكلينه طيب؟ ماتغديتي"
"لا مو مشكله اكلم نوف تجيب لي الحين"
يوسف: "ليش تكلمين نوف، انا الحين اروح اجيبلك، وش تبين تاكلين"
"مدري وش فيه عندكم"
يوسف: "تبين مكدونالدز؟"
"طيب"
يوسف: "بس لازم تجين معي، مايصير اتركك بالبيت بلحالك"
"مايوصلون هم؟"
يوسف: "يوصلون بس نروح حنا احسن، ومنه تشوفين الديره"
"طيب.. بس اقوم البس بسرعة و اجيك"
يوسف: "يلا انتظرك انا"
لبست و طلعنا.
بالطريق .
يوسف: "تنتظرين احد؟"
ناظرته.
يوسف: "كل شوي تناظرين جوالك، منتظره احد؟"
"ايه، انتظر امي تدق"
يوسف: "ما ردو عليك للحين؟"
"لا ردو حاكيتها من شوي، بس انتظرها ترجع تدق.. تصدق انا بدق عليها ماقدر انتظر اكثر"
اتصلت على امي.
-ايه ريما
-ها يمه وش صار؟
-قلت لأخوك، قال بس يصحى يجيبهم
-بس يصحى وشو يايمه نتايج تحاليل تراهم
-طيب ندري انها نتايج تحاليل، نايم اخوك و عيا يصحى وش اسويله!
-ماتقدرين تروحين انتي؟
-واترك ابوك بالبيت
-يمه صحيه يعني نقعد ننتظر على مايصحى الشيخ
-ريما ماما، انتي ماعليك موب صاير الا الخير ان شاءالله، لاتقعدين كل شوي تدقين
-طيب يمه انا بسكر الحين، مع السلامه.
يوسف: "صاير شي؟"
وصلنا و يوسف وقف السيارة على جمب .
"دقيقة"
اتصلت على فيصل اخوي،
-خير
-فيصل قوم جيب تحاليل ابوك
سكر بوجهي.
اتصلت ثاني.
-نايم وشو بقره انتي ماتفهمين؟
-قوم جيب التحاليل فيصل حرام عليك! الرجال يطلع فيه شي وانت نايم حرام
-والله؟ دامك خايفة عليه كذا ليه رحتي و خليتيه؟
-والله مادريت انه بيصير كذا! و على بالي تاركه رجال وراي بيدير باله على ابوه!
-اقول بس يالبزر، لاتكثرين حكي ولاعاد تدقين لا اكسر الجوال على راسك تفهمين؟
نزلت من السياره.
-فيصل لوسمحت روح جيب التحاليل امي ماتقدر تجيبهم! روح جيبهم و بعدها نام كثر ماتبي، لو سمحت فيصل اخاف يطلع فيه شي، خلنا نلحق لو فيه شي نعالجه من بدري..
-لاحول انتي شكلك ماتفهمين
و سكر.
-فيصل!!! فيصل قاعدة اكلمك!!!
رجعت اتصلت ثاني
معد صار يرد.
"غبيه! غبيه تركته لحاله!!! غبيه !!!"
يوسف: "ريما صاير شي؟"
كان فيه كراسي قعدت فيها.
"ابوي تعب امس و ودوه المستشفى، و طلبو منه يسوي تحاليل، واليوم طلعت، و فيصل معيي يجيبها"
يوسف: "طيب السواق؟"
"مايعطونه، بعدين مايفهم اصلا"
يوسف: "و خالتي سعاد؟"
"تقول ماتقدر تروح وتترك ابوي"
يوسف: "طيب اختك نوره؟"
"اختي نوره، صح ممكن"
اتصلت عليها.
-الو
-هلا نوره
-ريما؟ خير فيه شي؟
-لا لا مافيه، بس تعرفين ان ابوي كان تعبان امس صح؟
-ايه قالولي
-واليوم طلعت تحاليله،
-ايه؟ ووش طلع؟
-ماشفنا وش طلع، محد راضي يجيب التحاليل، شرايك تمرين انتي او ماجد..
-يعطونا اياها عادي؟
-ايه خذي من امي رقم الملف و وريهم الهوية حقتك، بس يشوفون انك بنته
-طيب طيب الحين اقول لماجد
-يلا و علميني وش يصير.. شكراً
-ان شاءالله مع السلامه
يوسف: "ها وش صار؟"
"الحمدلله بتروح تشوف"
يوسف: "زين الحمدلله.. "
"مفروض ماتركته ورحت، ليتني ماجيت وجلست معه.."
يوسف: "ان شاءالله موب صاير الا كل خير لاتشغلين بالك"
"ان شاءالله.."
يوسف: "يلا تقومين ناكل؟"
"يلا"
يوسف: "تبين ناخذه و ناكله بالبيت ولا نقعد؟"
"مدري اي شي"
يوسف: "نقعد علشان اذا خلصو من السوق يصير قريب مننا"
"طيب نقعد"
...
طلبنا و قعدنا.
يوسف: "ايه احكيلي عنك"
ضحكت: "وش احكيلك"
يوسف: "وش تسوين بحياتك، وش تدرسين، ماذكر متى اخر مره شفتك تصدقين"
"انا اذكر، ب ٢٠١٠ هنا بامريكا بعد، لما كنت توك جاي"
يوسف: "ايه صح"
"والمره اللي قبلها بالعيد ب ٢٠٠٩"
يوسف: "ايه.. اذكر هذاك العيد ببيت امي موضي"
"ايه، شفت كيف اذكر"
يوسف: "ايه ماشاءالله، طيب وش تدرسين علميني"
"نفس فيصل"
يوسف: "كلكم ماشاءالله داخلين نفس ابوكم"
"ايه"
يوسف: "وكم سنه بقالك؟"
"٣ سنين ان شاءالله، انت علمني وش سويت كم بقى؟ مره طولت"
يوسف ابتسم: "قلتيها من ٢٠١٠، صارلي ست سنين ومابعد خلصت"
"ماعليه خيره ان شاءالله، بس ليه طولت كذا؟"
يوسف: "غيرت من ولاية و وقفت كم سمستر، و كنت برجع و سوالف، يعني تقدرين تقولين مو متوفق بهالدراسه ابد"
"وكم بقى و تخلص؟"
يوسف: "سنه، الصيف الجاي، يعني نفس هالوقت السنه الجايه اصير مخلص"
"مره حلو طيب ماشاءالله"
يوسف: "تصدقين احيان اقول ليتني ماجيت هنا، ليتني درست بالرياض و اهلي حولي و مرتاح مب هنا جالس ست سنين بلحالي"
ضحكت: "كان قلت لمنور تزوجك"
يوسف: "قلت والله، بس عيت"
ضحكت: "امزح ماعليه خلاص هانت مابقى شي"
يوسف: "ايه هانت الحمدلله"
ناظرت الالعاب اللي ورانا و ابتسمت.
يوسف: "شفيك"
"تذكرت يوم كنا نروح مكدونالدز و حنا صغار، يوم كنا نلعب بنفس هذي الالعاب"
يوسف ابتسم: "ايه مع عيال خالتي، و تذكرين لما كنا نلعب كوره"
"لو سمحت انا ماكنت العب، كنتو تحطوني حارس و تفقشون راسي"
ضحك: "اذكر حرام يوم تعورتي و قمنا نصيح"
"تصيحون خايفين من ابوي مب زعلانين عليّ"
يوسف: "ايه طبعاً بنخاف اجل بنزعل عليك"
ضحكت.
يوسف: "اذكر ذيك السنه يوم جيتو كانت صاحبتك معك صح؟"
"ايه.. عبير"
يوسف: "هي و اخوها الدب"
ضحكت: "حرام عليك"
يوسف ضحك: "للحين دب ماشاءالله؟"
"مدري والله.. ماعرف عنها شي.."
يوسف: "عاد كنتو مره صديقات"
"ايه.. بس معد صرنا نحكي"
يوسف: "اوه... بكيفها هي الخسرانه.."
ابتسمت.
قعدنا شوي نسولف سوالف عاديه الين اتصلت عمتي و مشينا.
..
قعدنا بالليل بالصاله انا و البنات نسولف.
ياسمين: "لقيت فستان يجنن، صورته لتركي هو بعد قال حلو، شكلي برجع اخذه"
نوف: "لسا تونا اول يوم يمكن تلقين احلى"
ياسمين: "ويمكن ما القى، خليني اخذ هذا دامني لقيته"
"فستان وشو"
ياسمين: "فستان عرس"
"ما كأنه بدري شوي؟"
ياسمين: "لا ان شاءالله خلاص قريب الزواج"
نوف: "قريب وين وانتو ما بعد ملكتو؟"
ياسمين: "ايه نملك و نتزوج عقبه بفترة"
نوف: "و امك بتوافق؟"
ياسمين: "ايه ليش ماتوافق، ريما تجين معي بكره اجربه؟ واذا زين اشتريه خلاص"
"ايه عادي اجي معك"
ياسمين: "لاتعلمون امي اني صورته لتركي"
نوف: "فال شين يقولون"
ياسمين: " و بصدق انا يعني انه فال شين"
نوف: "مايصير يشوف الفستان ولا يشوف شكلك كيف بيصير علشان يتفاجأ"
ياسمين: "لا انا وياه مانصدق هالكلام"
قعدنا نسولف بعدها كل وحدة راحت لغرفتها.
قعدت اسولف مع نوف بالغرفه الين نامت.
طلعت قعدت بالصاله ..
اتصلت على ابوي اخيراً رد.
-هلا يبا حبيبي وشلونك
-الحمدلله انا بخير انتي بشريني عنك
-الحمدلله متمنيتك معي والله
-ان شاءالله المره الجايه..
-يبا شلون صحتك الحين؟ التحاليل تقول امي طلعت زينه
-ايه الحمدلله
-طيب يبا امي جمبك؟
-لا راحت لخالتك ليه
-بسألك سؤال و تجاوبني صدق طيب؟
-وش عندك
-انت زعلان لأني رحت؟ يعني ودك انك ماوافقت؟
-لا حبيبتي العكس.. انا زعلان لاني مب قادر اوديك.. ولا ابيك تستانسين انا
-صدق؟ يعني موب زعلان اني رحت و خليتك؟
-لا يا بابا انا عندي امك و اخوانك هنا، بعدين انتي طول عمرك معي ماقصرتي
-حبيبي انت
قعدت اسولف معه شوي
يوم خلصت طلع يوسف من غرفته.
يوسف ابتسم: "كل ماطلعت القاك هنا"
"وش اسوي عجبتني صالتك"
يوسف: "عادي اقعد؟"
"ايه اكيد"
يوسف: "ليه مانمتي"
"قمت المغرب شلون بنام الحين، انت ليش مانمت؟"
يوسف: "لا انا ما انام"
ضحكت: "لا صدق ليه مانمت"
يوسف: "صدق ما انام"
"شلون يعني ماتنام"
يوسف: "يعني ما انام الحين، انام ساعة ساعتين تكفيني"
ضحكت: "هذي انا ايام الاختبارات"
ابتسم.
"يوسف احكيلي عنك، انا حكيت لك عن نفسي، قولي وش تسوي وين تروح شلون حياتك"
يوسف: "والله ابد حياتي انتظر متى اتخرج و ارجع الرياض"
"وش تسوي هنا طيب كيف تشغل نفسك وين تطلع؟"
يوسف: "لا زمان كنت اطلع، الحين صرت كوره بس"
"تشوف كوره يعني؟"
يوسف: "لا العب"
"حلو، تلعب وين"
يوسف: "بفريق الجامعة"
"اوه يعني فريق صدقي و تلبسون نفس الشي وكذا"
يوسف: "ايه"
"وناسه، طول السنه تلعبون؟"
يوسف: "ايه، و فيه فريق ثاني بعد حق سعوديين"
"حلو يعني تشغل نفسك بالكوره"
يوسف: "ايه، تبين تجين تشوفين؟"
"والله كنت بقولك تو بس استحيت"
ابتسم: "لاعادي اوديك معي تشوفين، تبين بكره الصبح عندي تمرين"
"ياسمين تبيني اروح معها السوق الصبح"
يوسف: "متى بتروحون"
"مدري قالت الصبح"
يوسف: "خلاص نشوف بكره لو قدرتي، و لو ماقدرتي يوم ثاني انتو مطولين ان شاءالله "
"ايه ان شاءالله"
...
ليست هناك تعليقات:
إرسال تعليق