وانا نازلة مع محمد.
شفنا عمتي منيره .
محمد: "وشفيك خالتي ما اكلتي"
عمتي منيره: "وخر بس روح كل مع امك"
محمد: "هاو شفيها"
عمتي سلوى: "تعال يمه اتركها تعال"
"شفيها معصبة عمتي؟"
عمتي سلوى: "سألناها عن ياسمين عصبت، ولا كأننا من العايلة"
محمد: "اكيد سألتيها؟ ولا قعدتي ترمين كلام؟"
ماما موضي: "شف اللي مايستحي وشلون يكلم امه، جايب قلة الاحترام من ابوه"
محمد: "وش سوالك ابوي يا بنت الحلال" و ضحك.
محمد هو الحفيد المكروه عند ماما موضي.
وفيصل اخوي الحفيد المفضل.
والباقين ماتحبهم ولا تكرهم بس تهاوشهم طول الوقت.
ماما موضي: "ابوك مثلك مايستحي على وجهه!"
عمتي سلوى: "خلاص يا يمه اتركيه"
ماما موضي: "اسكتي انتي الثانية! جايبتلي عيالها كلهم ياكلون معي وانا مابيهم، وين عيالي ريما وين ابوك ورا ماجا"
عمتي سلوى: "توني مكلمه سعاد تقول بيتأخرون يجون عقب الغدا"
ماما موضي: "تلقينه يوديها تتغدا برا الشيخة"
محمد: "وانتي ابوي فيصل الله يرحمه ماكان يغديك برا؟"
ماما موضي: "انت اسكت ولا كلمة"
ضحكت.
جت نوف.
ماما موضي: "جات جات، لا صح النوم صرنا مغرب"
نوف: "ليت والله تتركوني الين المغرب"
ماما موضي: "قاعدة هي و عيالها و غاثيني و مايصحون الا المغرب"
عمتي سلوى: "يمه حنا جايين علشانك نوسع صدرك بدل ماتقعدين بلحالك"
ماما موضي: "لا ماتوسعون صدري انتي و عيالك خذيهم و روحي بيتكم ازين"
عمتي سلوى: "ان شاءالله ابشري عقب الغدا نواف يحجزلنا على الرياض، نروح و نترك لك البيت تقعدين فيه بروحك"
ماما موضي: "اقعد مع ولدي"
عمتي سلوى: "ولدك عنده بيته و زوجته مب فاضي"
ماما موضي: "ولدي عبدالكريم"
عمتي سلوى: "الله يهديك يمه، الحين تعوفينا و تقعدين مع عبدالكريم اللي ماتفهمين منه كلمة"
محمد: "استغفرالله يمه وش هالكلام"
ماما موضي: "هذا اللي ما افهم منه كلمة اخوك"
عمتي سلوى: "دارية انه اخوي بس تقعدين مع واحد متخلف وش تسوين"
ماما موضي: "انتي المتخلفة و عيالك المتخلفين!!"
و قامت راحت غرفتها.
عمتي سلوى: "قوم نواف روح راضها"
محمد: "لا والله؟ تنكدين على الحرمة و تقولين ولدك متخلف و تقولينله روح راضها"
عمتي سلوى: "قليل اللي قالتلي اياه يعني"
محمد: "وش قالت! بعدين امك و مره كبيره"
عمتي سلوى: "اقول يازينك ساكت بس، قوم نواف"
نواف: "اتركيها يمه بتعصب عليّ، يجي الحين فيصل يحاكيها و ترضى"
محمد: "الحين تعلمينا شلون نحترمك وانتي كذا تحاكين امك"
عمتي سلوى: "انت اسكت بس انت تعرف تحترم احد اصلا!!"
وقامت هي بعد.
نوف: "وش هالغدا اللي محد قعد فيه"
محمد: "انتي بعد وشوله تعلمينها على ياسمين"
"ايه نوف ليه قلتيلها الله يهديك"
نوف: "هي سألت وش اقول، قالت ليش راجعين الحين و ليش ياسمين مب معكم، ماعرفت اكذب"
محمد: "تدرين ان خالتي ماتبي احد يدري"
..
مرت الأيام..
خالتي منيره وخالتي سلوى اثنينهم رجعوا الرياض .
نوف قعدت مع امي موضي ماراحت معهم.
كنا قاعدين بالصالة ببيت امي موضي.
نوف: "بتجين معي الدي جي اليوم صح؟"
"مادري مالي خلق"
نوف: "يلا ريما تكفين بروح بلحالي"
"صديقاتك طيب"
نوف: "ايه بس مره كبير هو واكيد كلهم يعرفون بعض و بيقعدون مع بعض و انا ماعندي صديقات واجد هنا بجدة، تكفين مابي اقعد بلحالي"
"مدري.."
نوف: "تخافين تشوفينهم صح؟"
"مو اخاف بس ماودي اضيق صدري.. اكيد بيجون يعرفون نص البنات، وانا ماودي اروح و يصير الوضع غريب"
نوف: "ماعليك منهم انتي رايحة تستانسين وتوسعين صدرك"
"ان شاءالله.."
نوف: "يعني بتجين؟"
"ان شاءالله"
نوف: "ودي اطلبك طلب بس ادري مارح توافقين"
"وشو بعد"
نوف: "اخوك احمد"
"شفيه مو قلنا ما كأنه صار شي"
نوف: "بس ريما احبه"
"حبتك المنيب قايله! وش اللي تحبينه ماكفاك اللي صار!"
نوف: "ابي اكلمه تكفين بس هالمره اتفاهم معه و عقبها خلاص"
"كلميه انا مالي شغل فيك ماتتوبين انتي"
نوف: "لانه ماعمرك حبيتي مارح تفهمين وش اقصد!"
"قلتلك كلميه مالي شغل فيك"
نوف: "شلون اكلمه.. مايرد عليّ.. انتي كلميه تكفين"
"تبيني اكلم اخوي اللي ماعرف شكله ولا اذكر متى اخر مره شفته"
نوف: "لا، تكلمين حصه و حصه تكلمه"
"لا لا لا مب صاحية انتي، تراهم مب زينا ابد، ابوي مشدد عليهم مره و صايرين مثله، يعني ماعندهم هالسوالف والله ان درت حصه معد تحاكيني، بعدين تبينها تاخذ فكرة مب زينه عنك"
نوف: "ريما الله يخليك.. اجل قوليلها ابي رقمه و انتي كلميه"
"قلتلك لا"
نوف: "يلا تكفين.."
"نوف خلاص قلتلك مالي شغل فيك لا تحاكيني بهالموضوع مره ثانيه!"
...
بالليل تحممت و لبست و قاعدة اتجهز اروح مع نوف .
جتني امي.
امي: "ابوك داري انك رايحة مع نوفوه؟"
"لا الحين اذا خلصت اقوله"
امي: "يعني واثقة انه بيوافق؟"
"يمه وشفيها حفلة بنات عادية"
امي: "ايه مو حنا ماجتنا المصايب الا من هالبنات"
"مصايب وشو يا يمه ليه تكبرين المواضيع كذا"
امي: "روحي علميه الحين و استأذني منه تروحين او لا"
"طيب بس البس اروح كذا"
امي: "بسرعة هو طالع بعد شوي"
"حاضر ابشري"
..
وافق ابوي لبست و خلصت و اتصلت عليّ نوف قالتلي انها برا بالسيارة تنتظر.
اخذت عباتي و نزلت.
ركبت السيارة وحنا ماشيين جا اخوي فيصل.
وقف السواق و قاله يفتح الشباك.
فتحت انا شباكي.
"ها فيصل شتبي"
فيصل: "وين رايحة"
"بنروح دي جي انا و نوف"
فيصل: "دي جي وشو"
"صديقة نوف وش يعني دي جي وشو"
فيصل: "وش اسمها من بنته"
ناظرت نوف: "من بنته؟"
نوف: "**"
ناظرني فيصل: "بعد ماتعرفين و رايحة؟"
"نسيت اسمها شتبي الحين يلا متأخرين"
فيصل: "طيب لانك بالسيارة الحين مارح انزلك بس مره ثانيه ماتروحين فاهمه"
"وش اللي ماتروحين على كيفك هو، ابوي راضي انك مالك شغل"
فيصل: "طيب طيب غطي وجهك اقول بس"
"واذا ماغطيته وش بتسوي"
فيصل: "ابكفخك و انزلك من السيارة مع شعرك"
نوف: "خلاص غطيه ريما سلكي!"
غطيته.
سكرت الشباك و مشينا.
نوف: "اخوك وش جوه؟"
فتحت غطوتي: "مادري مريض"
نوف: "متغير مره"
"لا مب متغير بس لانه رايحين عصب"
نوف: "ليش يعصب تراها بنات بس الحفله"
"ايه لانها بنات عصب، مايبيك تتحركين من البيت"
نوف: "الله يعينك عليه بس"
...
وصلنا.
كان زحمة مره.
وظلام شوي اشوه علشان محد يشوف احد.
قعدنا جمب صديقات نوف .
قعدت هي تسولف وانا ماسكة جوالي.
مابي اشوف احد ولا ابي احد يعرفني او يشوفني..
بنات مدرستي كلهم مابيهم يشوفوني ..
شفت كثير بنات كانو معنا ..
توترت مره مابي اشوفهم .
قلت لنوف اني بروح الحمام.
رحت دخلت و سكرت الباب و قعدت.
طولت بالحمام الين اتصلت عليّ نوف.
نوف: "وينك احسبك رحتي؟ جيت الحمام مالقيتك"
"ايه داخل انا"
نوف: "طيب تعالي وشفيك ريما حنا جايين نستانس ماعليك منهم"
"يلا جاية.."
طلعت غسلت ايدي، كان الحمام زحمة شوي .
كان فيه بنتين حسيت انهم قاعدين يناظروني و يحكون.
ماناظرت وجيههم من الخوف بس لاحظت انهم واقفين مب قاعدين يسوون شي،
يوم جيت اطلع لحقوني.
-"لو سمحتي"
التفت: "هلا.."
ناظرت وجه البنت.
اشوه ماعرفها.
-"شلونك"
"الحمدلله بخير.."
-"بس انا مشبهه عليك، انتي بنت **"
"لا والله.." وابتسمت و جيت ابمشي.
-"طيب ماعليه وش اسمك"
"ريما"
-"ريما وشو"
"ريما **"
-"اوه، مايصيرون لك عايلة **"
"لا والله ماعرفهم.."
-"تشبهينهم مره"
ابتسمت.
و مشيت، اخيراً تركتني.
رحت لنوف و قلتلها.
نوف: "وهي وش اسمها"
"مدري ما سألتها"
نوف: "خبله؟ هي تسألك وانتي ماتعرفينها"
"مدري خفت تكون سمعت بالسالفة او تعرفني .."
نوف: "لحول مانتي و هالسالفة اللي من كم سنة نسوها الناس وانتي مانسيتي"
"ان شاءالله نسوها.."
نوف: "طيب تعالي تو ذقت شي لذيذ مره بروح اجيب لي منه"
"لا انتي روحي انا مكاني هنا زين.."
نوف: "لاحول، طيب خلي شنطتي معك"
وقامت.
قعدت و عيوني بجوالي مابي اناظر احد.
-"ريما"
رفعت راسي،
البنت اللي تو .
-"تعالي اقعدي معنا"
"لا معاي بنت عمتي الحين بتجي"
-"طيب انتي و بنت عمتك تعالو"
"لا معها صديقاتها، انتي اقعدي اذا ودك"
-"طيب دقيقة انادي البنات"
راحت .
وش جبت لعمري انا.....
جت نوف.
"نوف خلينا نمشي"
نوف: "وش نمشي تونا هاو"
"نوف تكفيين بسرعة مابي اقعد"
نوف: "وشفيك شفتيهم"
"ماشفتهم بس مابي اشوف"
نوف: "خلاص دامك ماشفتيهم ليش تبين تروحين"
"ياربيه نوووف تكفين"
-"ناديتهم الحين جايين" و قعدت البنت جمبي .
ناظرت نوف البنت.
"هذي نوف بنت عمتي .. نوف هذي .."
ابتسمت البنت: "هديل ال*"
قعدت معنا هديل .
و جو صديقاتها .
ماكان فيه محل يكفيهم.
قعدو نصهم و الباقين راحو مكان ثاني .
قعدت هديل تسولف ماشاءالله عليها ما سكتت .
"انا بروح حمام"
هديل: "يلا انا بعد احس شكلي حوسة"
لحول .
قمنا انا وياها رحنا الحمام.
دق جوالها.
هديل: "هذي صاحبتي توها توصل، بروح اجيبها و اجيك"
"طيب"
رحت اغسل و قعدت اعدل شكلي الين ترجع .
كان ودي ارجع مكاني بس استحيت.
جات ومعها صديقتها.
هديل: "اشوه احسبك رحتي"
ابتسمت: "لا انتظرك"
هديل: "هذي صديقتي جواهر"
ناظرت صديقتها .
"جواهر؟"
